aaj mausam baḌā suhānā hai
yaad aayā koī fasāna hai
ashk maazī sharāb aur ġhazleñ
rabt in se mirā purānā hai
ġhurbatoñ ke ye daur haiñ achchhe
chāñd tāroñ pe shāmiyāna hai
ye tirī yaad hai tire jaisī
kaam in kā mujhe satānā hai
khol dil kī girah zarā tū bhī
ye taġhāful to bas bahāna hai
dasht ko dasht rahne de insāñ
be-zabāñ kā ye āshiyāna hai
kārvāñ saath thā kabhī mere
aaj 'ġhāfil' huā zamāna hai