biich samundar rahtā huuñ
lekin phir bhī pyāsā huuñ
apne bachchoñ kī nazroñ meñ
maiñ do din kā bachcha huuñ
zulm sahūñ ḳhāmosh rahūñ
kyā maiñ ek farishta huuñ
sadiyāñ paḌh kar duniyā kī
lamhe us ke samjhā huuñ
sach kahne kī aadat hai
yuuñ maiñ mujrim Thahrā huuñ
bhiiḌ meñ tanhā rahne kā
zahr hamesha piitā huuñ
sab apne se lagte haiñ
maiñ bhī kitnā sīdhā huuñ
ḳhushbū le kar chāhat kī
bastī bastī phirtā huuñ