qazā hai zindagī lagne lagā thā
mujhe jab alvidā.a us ne kahā thā
bahut royā vo dīvāroñ se lag kar
makāñ meñ aur us ke kyā bachā thā
maiñ apne paas hī baiThī thī din bhar
kisī kā saath dūbhar ho rahā thā
ye qismat hai ki murjhā.ī nahīñ maiñ
zamīñ ko jab mirī badlā gayā thā
jo tum the saath to har sū thī ḳhushbū
havāoñ meñ na jaane kyā ghulā thā
thī itnī bekalī manzil kī mujh ko
ki mere saath rasta chal paḌā thā