vo but binā nigāh jamā.e khaḌā rahā

maiñ aañkh band kar ke use pūjtā rahā

ḳhush-fahmiyoñ kā aaj bharam khul gayā to kyā

ik moḌ par to us kā mirā sāmnā rahā

tum ko to ek umr huī hai judā hue

hairāñ huuñ rāt-bhar maiñ kise DhūñDhtā rahā

ik ik darīcha band thā phir bhī ye Dar rahā

chhup-chhup ke jaise koī hameñ jhāñktā rahā

us kī nigāh fitna-adā to bahāna thī

ḳhud merā dil bhī merā lahū chūstā rahā

'anjum' kise ḳhabar ki koī mahv-e-intizār

kal jaltī dopahar meñ akelā khaḌā rahā