zamīñ ke saare manāzir se kaT ke sotā huuñ
maiñ āsmāñ ke safar se palaT ke sotā huuñ
maiñ jam.a kartā huuñ shab ke siyāhī qatroñ ko
ba-vaqt-e-sub.h phir un ko palaT ke sotā huuñ
talāsh dhuup meñ kartā huuñ saarā din ḳhud ko
tamām-rāt sitāroñ meñ baT ke sotā huuñ
kahāñ sukūñ ki shab-o-roz ghūmnā us kā
zarā zamīn ke mehvar se haT ke sotā huuñ
tire badan kī ḳhalāoñ meñ aañkh khultī hai
havā ke jism se jab jab lipaT ke sotā huuñ
maiñ jaag jaag ke rāteñ guzārne vaalā
ik aisī raat bhī aatī hai DaT ke sotā huuñ