vo apne band-e-qabā kholtī to kyā lagtī

ḳhudā ke vāste koī kahe ḳhudā-lagtī

yaqīn thī to yaqīñ meñ samā ga.ī kaise

gumān thī to gumāñ se bhī māvarā lagtī

agar bikhartī to sūraj kabhī nahīñ ugtā

tirā ḳhayāl ki vo zulf bas ghaTā lagtī

tire marīz ko duniyā meñ kuchh nahīñ lagtā

davā lage na raqīboñ kī bad-duā lagtī

huī hai qaid zamāne meñ raushnī kis se

bhalā vo jism aur us ko koī qabā lagtī

lagī vo tujh sī to aalam meñ munfarid Thahrī

vagarna aam sī lagtī agar judā lagtī