mire andar ravānī ḳhatm hotī jā rahī hai
so lagtā hai kahānī ḳhatm hotī jā rahī hai
use chhū kar laboñ se phuul jhaḌne lag ga.e haiñ
mirī ātish-fishānī ḳhatm hotī jā rahī hai
sulagte dasht meñ ab dhuup sahnā paḌ ga.ī hai
tumhārī sā.ebānī ḳhatm hotī jā rahī hai
hamārā dil zamāne se ulajhne lag gayā hai
tumhārī hukmarānī ḳhatm hotī jā rahī hai
samundar se simaT kar jhiil bante jā rahe haiñ
hamārī be-karānī ḳhatm hotī jā rahī hai