koī hairat hai na is baat kā ronā hai hameñ

ḳhaak se uTThe haiñ so ḳhaak hī honā hai hameñ

phir ta.alluq ke bikharne kī shikāyat kaisī

jab use kāñch ke dhāgoñ meñ pironā hai hameñ

uñgliyoñ kī sabhī poroñ se lahū ristā hai

apne dāman ke ye kis daaġh ko dhonā hai hameñ

phir utar aa.e haiñ palkoñ pe sisakte aañsū

phir kisī shaam ke āñchal ko bhigonā hai hameñ

ye jo aflāk kī vus.at meñ liye phirtī hai

is anā ne hī kisī roz Dubonā hai hameñ