kalejā muñh ko aatā hai shab-e-furqat jab aatī hai
akele muñh lapeTe rote rote jaan jaatī hai
lab-e-nāzuk ke bose luuñ to missī muñh banātī hai
kaf-e-pā ko agar chūmūñ to mehñdī rañg laatī hai
dikhātī hai kabhī bhālā kabhī barchhī lagātī hai
nigāh-e-nāz-e-jānāñ ham ko kyā kyā āzmātī hai
vo bikhrāne lage zulfoñ ko chehre par to maiñ samjhā
ghaTā meñ chāñd yā mahmil meñ lailā muñh chhupātī hai
karegī apne hāthoñ aaj apnā ḳhuun mashshāta
bahut rach-rach ke talvoñ meñ tire mehñdī lagātī hai
na koī zor us ayyār par ab tak chalā apnā
yahāñ dam TūTtā hai aur dam meñ jaan jaatī hai
taḌapnā tilmilānā loTnā sar pīTnā ronā
shab-e-furqat akelī jaan par sau aafat aatī hai
pachhāḌeñ khā rahā huuñ loTtā huuñ dard-e-furqat se
ajal ke paañv TūTeñ kyuuñ nahīñ is vaqt aatī hai