ḳhud apne aks ko apnī nazar meñ kyā rakhnā
ki ham ne chhoḌ diyā ghar meñ aa.ina rakhnā
kisī ke peḌ kā saaya na aa sake ghar meñ
gharoñ ke biich meñ itnā to fāsla rakhnā
tamām umr hī chāhe uḌaan meñ guzre
parā.ī shāḳh pe hargiz na ghoñsla rakhnā
mirī nazar bhī añdheroñ se uub saktī hai
koī charāġh to yaaro jalā huā rakhnā
lo tum bhī shauq se 'aslam' se ehtiyāt rakho
hameñ bhī aa gayā apnoñ se fāsla rakhnā