ġhunche chaTak ga.e chaman-e-rozgār ke
phūTe habāb mauj-e-nasīm-e-bahār ke
rizvāñ jo Tokegā dar-e-fridaus par hameñ
kah deñge rahne vaale haiñ ham kū-e-yār ke
āñkheñ taras rahī haiñ mirī terī zulf ko
taare chamak rahe haiñ shab-e-intizār ke
āġhāz meñ bhī ham ko hai anjām kā ḳhayāl
dhaḌke shabāb meñ bhī haiñ roz-e-shumār ke
mazmūn haiñ hiran mirī bandish kamand hai
ai 'qadr' shā.irī meñ maze haiñ shikār ke