vo hañstī āñkheñ hasīñ tabassum damaktā chehra kitāb jaisā

darāz qāmat hai sarv aasā hai rañg khilte gulāb jaisā

vo dhīme lahje ke zer-o-bam meñ phuvār jaisī hasīn rim-jhim

hai guftugū meñ baham tasalsul ravāñ ravāñ sā chanāb jaisā

kuchh us ke aariz kī dil-farebī kuchh us ke hoñToñ kā rañg dilkash

vo sar se pā hai ġhazal kā lahja nayā nayā sā shabāb jaisā

kabhī vo tasvīr ban ke dekhe kabhī vo tahrīr ban ke bole

vo pal meñ gum-sum vo pal meñ hairāñ kisī musavvir ke ḳhvāb jaisā

vo mere jazboñ kī ḳhush-nasībī yā us kī chāhat kī intihā hai

ki us kī āñkhoñ meñ aks merā nihāñ ayaañ sā hijāb jaisā

farishta sūrat duā kā saaya vo ruup insāñ kā dhaar aayā

hai us se duurī azaab mujh ko hai us kā milnā savāb jaisā

palaT ke dekhe to vaqt Thahre vo chal paḌe to zamāna hairāñ

vo rashk-e-ambar vo māh-e-kāmil vo kahkashāñ vo shahāb jaisā

kabhī vo sher-o-suḳhan kā shaidā kabhī vo tahqīq kā divāna

vo merī ġhazloñ kā husn-e-matl.a mire maqāle ke baab jaisā