tum ne hamārā saath diyā to ḳhud ko ham pā jā.eñge
varna apnī zaat se hamdam phir dhokā khā jā.eñge
kaḌī dhuup meñ ham le aa.e apne komal gītoñ ko
un ke phuul se chehre dekheñ dhuup meñ kumhlā jā.eñge
āñkheñ muuñd ke chalne vaale dhun ke pakke nikle to
chalte chalte ik din āḳhir manzil ko pā jā.eñge
kaun havāoñ ke par bāñdhe kaun hamārā rasta roke
aag kā dariyā hogā to bhī tair ke ham aa jā.eñge
dānā.ī ke shahr ke baasī pāgal-pan ke jañgal meñ
jañgal vaalo aañkh bachā kar aag sī bhaḌkā jā.eñge
man kī aañkh khule to samjho nuur kā ziina chaḌhnā hai
varna tan kī aañkh ke shīshe dhuup meñ dhuñdlā jā.eñge
dard-havā kā pīchhā karnā sab ke bas kī baat nahīñ
apnā pīchhā karte karte dost bhī uktā jā.eñge