mom kī tarah pighal kar dekho
phir kaḌī dhuup kā manzar dekho
karb hī karb hai sannāTe kā
jhāñk kar tum mire andar dekho
niiñd in palkoñ se katrā.egī
aag hai vaqt kā bistar dekho
aa ga.e ho to mire shahr meñ bhī
aadmī naam kā ḳhanjar dekho
koī shīshoñ kā masīhā hī nahīñ
duur tak dekho to patthar dekho
silsila maujoñ kā jaarī hai yahāñ
aao āñkhoñ meñ samundar dekho
koī mausam ho mire ghar meñ 'rafīq'
vahī sahrāoñ kā manzar dekho