agar har chiiz meñ us ne asar rakkhā huā hai
to phir ab tak mujhe kyuuñ be-hunar rakkhā huā hai
ta.alluq zindagī se muḳhtasar rakkhā huā hai
ki shānoñ par nahīñ neze pe sar rakhā huā hai
zamāne se abhī tak pūchhte haiñ us kī bāteñ
use ham ne abhī tak be-ḳhabar rakkhā huā hai
ab aisī be-samar saa.at meñ us kī yaad kaisī
ye dukh achchhe dinoñ kī aas par rakkhā huā hai
nikalnā chāhtā hai vus.at-e-sahrā meñ vahshī
baḌe jatanoñ se dil ko bāñdh kar rakkhā huā hai
sadā detā hai roz-o-shab koī aisā jazīra
jahāñ mere bhī hisse kā samar rakkhā huā hai
na jaane kaun sī manzil pe bujh jaa.eñ mirī āñkheñ
so maiñ ne ik ik ham-safar rakkhā huā hai