tum meñ to kuchh bhī vāhiyāt nahīñ
jaao tum aadmī kī zaat nahīñ
dil meñ jo hai vahī zabān pe hai
aur koī ham meñ ḳhaas baat nahīñ
sab ko dhutkārā darkinār kiyā
ek bas ḳhud hī se najāt nahīñ
khul ke milte haiñ jis se milte haiñ
zehn meñ koī chhūt-chhāt nahīñ
ik ta.alluq sabhī se hai lekin
sab se jaa.ez ta.alluqāt nahīñ
shā.irī hai ye shā.irī sāhab
ye sharīfoñ ke bas kī baat nahīñ