jab na tab suniye to kartā hai vo iqrār baġhair
guftugū ham se use par nahīñ inkār baġhair
bazm meñ raat bahut sāda-o-pur-fan the vale
garmī-e-bazm kahāñ us but-e-ayyār baġhair
dekh bīmār ko tere ye tabīboñ ne kahā
ho chukī us ko shifā sharbat-e-dīdār baġhair
jaan par aa banī hamdam mirī ḳhāmoshī se
baat kuchh ban nahīñ aatī hai ab iz.hār baġhair
jis kī ḳhātir ke liye yaar sab aġhyār hue
kyuuñ ki 'dīvāna' bhalā rahiye ab us yaar baġhair