maiñ apne saath koī aisī chaal chal jā.ūñ
har ik hisār se bachtā huā nikal jā.ūñ
tamām samt havāo bikher do mujh ko
simaTtī ret huuñ dīvār meñ na Dhal jā.ūñ
kuchh aisā loch mire darmiyān paidā kar
har ek choT pe ik geñd sā uchhal jā.ūñ
kisī ke jism meñ paivast ho na jā.ūñ kahīñ
maiñ kyuuñ na kāñch kī sab kirchiyāñ nigal jā.ūñ
tū apnā bojh uThā merā e'tibār na kar
na jaane barf kī sat.h se kab phisal jā.ūñ