thī nazāre kī ghaat āñkhoñ meñ
kaT ga.ī saarī raat āñkhoñ meñ
dekho un āñkhoñ kī suḳhan-goī
hai sharārat kī baat āñkhoñ meñ
talḳh bāteñ haiñ mīThī nazreñ haiñ
zahar muñh meñ banāt āñkhoñ meñ
ronā qismat meñ hai marūñ kyūñkar
hai ye āb-e-hayāt āñkhoñ meñ
vo jo dekhe jiyūñ na dekhe marūñ
hai hayāt-o-mamāt āñkhoñ meñ
dekhiye chashm-e-afv-e-rahmat se
'mehr' kī hai najāt āñkhoñ meñ