jab kabhī hoñge to ham mā.il-e-ġham hī hoñge

aise dīvāne bhī is daur meñ kam hī hoñge

ham to zaḳhmoñ pe bhī ye soch ke ḳhush hote haiñ

tohfa-e-dost haiñ jab ye to karam hī hoñge

bazm-e-ālam meñ jab aa.e haiñ to baiTheñ kuchh aur

bas yahī hogā nā kuchh aur sitam hī hoñge

jab bhī barbād-e-vafā koī nazar aa.e tumheñ

ġhaur se dekh liyā karnā vo ham hī hoñge

koī bhaTkā huā bādal koī uḌtī ḳhushbū

kaun kah saktā hai ik din ye baham hī hoñge