aks har roz kisī ġham kā paḌā kartā hai

dil vo ā.īna ki chup-chāp takā kartā hai

bahte paanī kī tarah dard kī bhī shakl nahīñ

jab bhī miltā hai nayā ruup huā kartā hai

maiñ to bahrūp huuñ us kā jo hai mere andar

vo koī aur hai jo mujh meñ jiyā kartā hai

rañg sā roz bikhar jaatā hai dīvāroñ par

kuchh diye jaisā darīche meñ jalā kartā hai

jaane vo kaun hai jo raat ke sannāTe meñ

kabhī rotā hai kabhī ḳhud pe hinsā kartā hai

roz rāhoñ se guzartā hai sadāoñ kā julūs

dil kā sannāTā magar roz baḌhā kartā hai