chup-chāp sulagtā hai diyā tum bhī to dekho

kis dard ko kahte haiñ vafā tum bhī to dekho

mahtāb-ba-kaf raat kase DhūñD rahī hai

kuchh duur chalo aao zarā tum bhī to dekho

kis tarah kināroñ ko hai siine se lagā.e

Thahre hue paanī kī adā tum bhī to dekho

yādoñ ke saman-zār se aa.ī huī ḳhushbū

dāman meñ chhupā laa.ī hai kyā tum bhī to dekho

kuchh raat ga.e roz jo aatī hai fazā se

har dil meñ hai ik zaḳhm chhupā tum bhī to dekho

har hañste hue phuul se rishta hai ḳhizāñ kā

har dil meñ hai ik zaḳhm chhupā tum bhī to dekho

kyuuñ aane lagīñ saañs meñ gahrā.iyāñ socho

kyuuñ TuuT chale band-e-qabā tum bhī to dekho