karegā yaad hameñ duur ham agar jaa.eñ
is ishtiyāq meñ jī chāhtā hai mar jaa.eñ
ye kah rahā thā hameñ Dūbtā huā sūraj
safar tamām huā apne apne ghar jaa.eñ
tulūa-e-shams kī kirnoñ ne ye payām diyā
ujāle bāñTte jaa.eñ jidhar jaa.eñ
dikhāte haiñ jo hameñ aa.ina kabhī us meñ
ḳhud apne aks ko dekheñ to aap Dar jaa.eñ
na paar lagne kī hasrat na Duub jaane kā ġham
ḳhayāl-e-yār ke dariyā meñ jab utar jaa.eñ
ye ghaav hī to mirī zindagī haiñ mere tabīb
ḳhayāl rakh ye mire zaḳhm hī na bhar jaa.eñ