mirī tum se shanāsā.ī bahut hai
magar ehsās-e-tanhā.ī bahut hai
bikhar jā.ūñ to ḳhud hī hai simaTnā
ki ye duniyā tamāshā.ī bahut hai
mujhe ġharqāb ho jaane kā hai Dar
sarāb-e-dasht dariyā.ī bahut hai
chalo ab sach bhī kah kar dekhte haiñ
yahāñ shor-e-pazīrā.ī bahut hai
nahīñ vus.at tire dariyā-e-dil meñ
magar āñkhoñ meñ gahrā.ī bahut hai
yahāñ se kuuch karnā hī paḌegā
tire kūche meñ rusvā.ī bahut hai
'asad' mushkil se ghabrātā nahīñ huuñ
dimāġh-o-dil meñ yaktā.ī bahut hai