sardī garmī barkhā tīnoñ ek saath hī baste haiñ
tere badan meñ vo jaadū hai saare mausam rahte haiñ
tere mere beach nahīñ hai ḳhuun kā rishta phir bhī kyuuñ
terī aañkh ke saare aañsū merī aañkh se bahte haiñ
ek zamāna biitā tere pyaar ke jañgal se nikle
yaad ke saañp to tanhā.ī meñ aaj bhī mujh ko Daste haiñ
va.ada kar ke bhuul bhī jaanā ye to terī aadat hai
maiñ hī nahīñ kahtā huuñ aisā log bhī aksar kahte haiñ