is baar havāoñ ne jo bedād-garī kī
phir mere charāġhoñ ne bhī shorīda-sarī kī
maiñ ne kisī hañste hue lamhe kī talab meñ
is shahr-e-dil-āvez meñ bas dar-ba-darī kī
kuchh aur vasīla mire iz.hār ko kam thā
sau maiñ ne mirī jaan sadā sher-garī kī
ai ahd-e-ravāñ maiñ tirā mehmān huā thā
lekin tire logoñ ne baḌī be-ḳhabarī kī
hālāñki ka.ī log haiñ nārāz bhī mujh se
jo baat bhī kī maiñ ne bahr-e-hāl kharī kī
paḌh letī haiñ lafzoñ kā tanaffus mirī socheñ
kuchh daad to dī jaa.e mirī dīda-varī kī
maiñ vo ki huuñ sadiyoñ kī masāfat kā musāfir
har lamhe kī aahaT ne mirī ham-safarī kī