ḳhizāñ kī shaam ko zaḳhm-e-bahār kis ne kiyā
har ek resha-e-gul rañg-bār kis ne kiyā
ḳhushī visāl kī saarī sameT lī tū ne
firāq lamhoñ ko bolo shumār kis ne kiyā
har ek shaḳhs yahāñ bad-gumān tujh se thā
nigāh-e-yār tirā e'tibār kis ne kiyā
ye mere ghar kī udāsī gavāhī degī tujhe
ki tere hijr ke dariyā ko paar kis ne kiyā
matā-e-jāñ ko kiyā ḳhaak kis ne tere liye
ye ḳhāk-e-jāñ hī batā.egī pyaar kis ne kiyā
vafā meñ jaan luTāne ke ba.ad bhī 'lubnā'
mire ḳhulūs-e-mohabbat pe vaar kis ne kiyā