zamīn-e-chashm-e-nam meñ ham ko terā ḳhvāb bonā thā
tirī har yaad kā motī to palkoñ meñ pironā thā
milan ke mausamoñ meñ jaane kyuuñ maiñ bhuul baiThī thī
tujhe bhī shahar kī is bhiiḌ meñ ai dost khonā thā
faqat apne ḳhayāloñ se na bāñdho yuuñ mire dilbar
kabhī dete rihā.ī mujh ko bhī kuchh der sonā thā
girā hai to ka.ī TukḌoñ meñ vo bikhrā paḌā hogā
tumhāre nam se hāthoñ meñ jo shīshe kā khilaunā thā
na jaane vaqt ne kyuuñ fāsle ye de diye varna
tumhī to mere jaise the tumheñ to merā honā thā