yuuñ har ik dard kā saudā to nahīñ ho saktā
maiñ tire shahr meñ rusvā to nahīñ ho saktā
mere bas meñ to na thā zaḳhm pe marham rakhnā
har koī shaḳhs masīhā to nahīñ ho saktā
maiñ tire dard ko mahsūs to kar saktā huuñ
maiñ tire ġham kā mudāvā to nahīñ ho saktā
raat be-chāñd munavvar to nahīñ ho saktī
ghar meñ be-sham.a ujālā to nahīñ ho saktā
hādisa ye hai ki patthar nahīñ insān huuñ maiñ
dil mirā lāla-e-sahrā to nahīñ ho saktā
tum bhī mānoge ki har baat kī had hotī hai
roz yuuñ vāda-e-fardā to nahīñ ho saktā