jo chāhte ho ki manzil tumhārī jaada ho
to apnā zehn bhī is ke liye kushāda ho
vo yaad aa.e to apnā vajūd hī na mile
na yaad aa.e to mujh ko thakan ziyāda ho
pahāḌ kaaT duuñ sūraj ko haath par rakh luuñ
zarā ḳhayāl meñ shāmil agar irāda ho
samajh sako jo zamāne ke tum nasheb-o-farāz
to apne ahd ke bachchoñ se istifāda ho
ye sochtā huuñ vo jis dam mirī talāsh kare
haqīqatoñ kā mire jism par libāda ho
hai justujū mujhe ik aise shaḳhs kī yaaro
jo ḳhush-mizāj bhī ho aur dil kā saada ho