is tarīqe ko adāvat meñ ravā rakhtā huuñ maiñ
apne dushman ke liye harf-e-duā rakhtā huuñ maiñ
maiñ faqīrī meñ bhī ahl-e-zar se behtar hī rahā
kuchh nahīñ rakhtā magar nām-e-ḳhudā rakhtā huuñ maiñ
maiñ kabhī tanhā nahīñ hotā sar-e-kunj-e-chaman
vo na hoñ to haath meñ dast-e-sabā rakhtā huuñ maiñ
maiñ ne kam khoyā sivā paayā hai kār-e-ishq meñ
dil jahāñ thā ab vahāñ ik dil-rubā rakhtā huuñ maiñ
jaane kab aa jaa.e vo sahbā misāl-e-fasl-e-gul
is liye vīrāna-e-dil ko sajā rakhtā huuñ maiñ