tum ne kahā thā chup rahnā so chup ne bhī kyā kaam kiyā
chup rahne kī aadat ne kuchh aur hameñ badnām kiyā
farzānoñ kī tañg-dilī farzānoñ tak mahdūd rahī
dīvānoñ ne farzānoñ tak rasm-e-junūñ ko aam kiyā
kunj-e-chaman meñ aas lagā.e chup baiThe haiñ jis din se
ham ne sabā ke haath ravāna un ko ik paiġhām kiyā
ham ne batāo kis tapte sūraj kī dhuup se maanī haar
ham ne kis dīvār-e-chaman ke saa.e meñ ārām kiyā
'sahbā' kaun shikārī the tum vahshat-kesh ġhazāloñ ke
matvālī āñkhoñ ko tum ne āḳhir kaisā raam kiyā