dost hai vo piiTh par aa.egā neza taan kar
bhaa.ī hai to jā mirī rusvā.ī kā sāmān kar
varna sīdhe se adā kar de sharāfat kā ḳhirāj
aur āzādī kī ḳhvāhish hai to baḌh elaan kar
tujh ko haq-talfī kā ye ehsās kyoñ hone lagā
saare andhe bāñTte haiñ revḌī pahchān kar
aa gale mil dard kā rishta hai apne darmiyāñ
itne zoroñ se na hindostān pākistān kar
mere ġham-ḳhāne ko jaise tū ne jal-thal kar diyā
mehrbāñ bādal kisī sahrā ko naḳhlistān kar
raushnī rahtī hai terī shīsh-mahloñ meñ sadā
chāñd pyāre merī kuTiyā par kabhī ehsān kar
us ne pūchhā tak nahīñ 'parvez' ho kis haal meñ
maiñ to us ke paas aa baiThā thā apnā jaan kar