dil jo ik jaa.e thī duniyā huī ābād us meñ

pahle sunte haiñ ki rahtī thī koī yaad us meñ

vo jo thā apnā gumān aaj bahut yaad aayā

thī ajab rāhat-e-āzādī-e-ījād us meñ

ek hī to vo muhim thī jise sar karnā thā

mujhe hāsil na kisī kī huī imdād us meñ

ek ḳhushbū meñ rahī mujh ko talāsh-e-ḳhad-o-ḳhāl

rañg fasleñ mirī yaaro huiiñ barbād us meñ

bāġh-e-jāñ se tū kabhī raat ga.e guzrā hai

kahte haiñ raat meñ kheleñ haiñ parī-zād us meñ

dil-mohalle meñ ajab ek qafas thā yaaro

said ko chhoḌ ke rahne lagā sayyād us meñ