sochā hai ki ab kār-e-masīhā na kareñge
vo ḳhuun bhī thūkegā to parvā na kareñge
is baar vo talḳhī hai ki rūThe bhī nahīñ ham
ab ke vo laḌā.ī hai ki jhagḌā na kareñge
yaañ us ke salīqe ke haiñ āsār to kyā ham
is par bhī ye kamrā tah-o-bālā na kareñge
ab naġhma-tarāzān-e-bar-āfroḳhta ai shahr
vāsoḳht kaheñge ġhazal inshā na kareñge
aisā hai ki siine meñ sulagtī haiñ ḳharāsheñ
ab saañs bhī ham leñge to achchhā na kareñge