shaam tak merī bekalī hai sharāb
shaam ko merī sarḳhushī hai sharāb
jahl-e-vā.iz kā is ko raas aa.e
sāhibo merī āgahī hai sharāb
rañg-ras hai merī ragoñ meñ ravāñ
ba-ḳhudā merī zindagī hai sharāb
naaz hai apnī dilbarī pe mujhe
merā dil merī dilbarī hai sharāb
hai ġhanīmat jo hosh meñ nahīñ maiñ
shaiḳh tujh ko bachā rahī hai sharāb
his jo hotī to jaane kyā kartā
muftiyoñ merī be-hisī hai sharāb