zikr-e-gul ho ḳhaar kī bāteñ kareñ
lazzat-o-āzār kī bāteñ kareñ
hai mashām-e-shauq mahrūm-e-shamīm
zulf-e-ambar-bār kī bāteñ kareñ
duur tak ḳhālī hai saharā-e-nazar
āhū-e-tātār kī bāteñ kareñ
aaj kuchh nā-sāz hai tab-e-ḳhirad
nargis-e-bīmār kī bāteñ kareñ
yūsuf-e-kan.āñ kā ho kuchh tazkira
misr ke bāzār kī bāteñ kareñ
aao ai ḳhufta-nasībo muflisho
daulat-e-bedār kī bāteñ kareñ
'jaun' aao kārvāñ-dar-kārvāñ
manzil-e-dushvār kī bāteñ kareñ