us ne ham ko gumān meñ rakkhā
aur phir kam hī dhyān meñ rakkhā
kyā qayāmat-numū thī vo jis ne
hashr us kī uThān meñ rakkhā
joshish-e-ḳhūñ ne apne fan kā hisāb
ek chup ik chaTān meñ rakkhā
lamhe lamhe kī apnī thī ik shaan
tū ne hī ek shaan meñ rakkhā
ham ne paiham qubūl-o-rad kar ke
us ko ek imtihān meñ rakkhā
tum to us yaad kī amaan meñ ho
us ko kis kī amaan meñ rakkhā
apnā rishta zamīñ se hī rakkho
kuchh nahīñ āsmān meñ rakkhā