nayā ik rishta paidā kyuuñ kareñ ham
bichhaḌnā hai to jhagḌā kyuuñ kareñ ham
ḳhamoshī se adā ho rasm-e-dūrī
koī hañgāma barpā kyuuñ kareñ ham
ye kaafī hai ki ham dushman nahīñ haiñ
vafā-dārī kā da.avā kyuuñ kareñ ham
vafā iḳhlās qurbānī mohabbat
ab in lafzoñ kā pīchhā kyuuñ kareñ ham
hamārī hī tamannā kyuuñ karo tum
tumhārī hī tamannā kyuuñ kareñ ham
kiyā thā ahd jab lamhoñ meñ ham ne
to saarī umr iifā kyuuñ kareñ ham
nahīñ duniyā ko jab parvā hamārī
to phir duniyā kī parvā kyuuñ kareñ ham
ye bastī hai musalmānoñ kī bastī
yahāñ kār-e-masīhā kyuuñ kareñ ham