inqalāb ek ḳhvāb hai so hai
dil kī duniyā ḳharāb hai so hai
rahiyo to yūñhī mahv-e-ārā.ish
bāhar ik iztirāb hai so hai
tar hai dasht us ke aks-e-manzar se
aur ḳhud vo sarāb hai so hai
jo bhī dasht-e-talab kā hai pas-e-rū
vahī zarrīñ-rikāb hai so hai
shaiḳh sāhab liye phireñ teġhā
barahman fat.h-yāb hai sau hai
dahr āshob hai savāloñ kā
aur ḳhudā lā-javāb hai so hai
is shab-e-tīra-e-hamesha meñ
raushnī ek ḳhvāb hai so hai