kyā batā.ūñ mujhe kyā lagtā hai
har-nafas tīr-e-jafā lagtā hai
huuñ vo ḳhuddār kisī se kyā kahūñ
saañs lenā bhī burā lagtā hai
phalte dekhī hai kahīñ shāḳh-e-sitam
mere kahne kā burā lagtā hai
hādse bhī haiñ baḌe kaam kī chiiz
dost dushman kā patā lagtā hai
merā sar to kahīñ jhuktā hī nahīñ
terā naqsh-e-kaf-e-pā lagtā hai
kyā kahūñ hālat-e-dil ai 'jarrār'
dard kuchh aur sivā lagtā hai