yuuñ to nahīñ ki pahle sahāre banā.e the
dariyā banā ke us ne kināre banā.e the
kuuze banāne vaale ko ujlat ajiib thī
puure nahīñ banā.e the saare banā.e the
ab ishrat-o-nashāt kā sāmān huuñ to huuñ
ham ne to diip ḳhauf ke maare banā.e the
dī hai usī ne pyaas bujhāne ko aag bhī
paanī se jis ne jism hamāre banā.e the
phir yuuñ huā ki us kī zabāñ kaaT dī ga.ī
vo jis ne guftugū ke ishāre banā.e the
sahrā pe bādaloñ kā hunar khul nahīñ sakā
qatre banā.e the ki sharāre banā.e the
'shāhid' ḳhafā thā kātib-e-taqdīr is liye
ham ne zamīñ pe apne sitāre banā.e the