fasāna ab koī anjām paanā chāhtā hai

ta.alluq TūTne ko ik bahāna chāhtā hai

jahāñ ik shaḳhs bhī miltā nahīñ hai chāhne se

vahāñ ye dil hathelī par zamāna chāhtā hai

mujhe samjhā rahī hai aañkh kī tahrīr us kī

vo aadhe rāste se lauT jaanā chāhtā hai

ye lāzim hai ki āñkheñ daan kar de ishq ko vo

jo apne ḳhvāb kī tābīr paanā chāhtā hai

bahut uktā gayā hai be-sukūnī se vo apnī

samundar jhiil ke nazdīk aanā chāhtā hai

vo mujh ko āzmātā hī rahā hai zindagī bhar

magar ye dil ab us ko āzmānā chāhtā hai

use bhī zindagī karnī paḌegī 'mīr' jaisī

suḳhan se gar koī rishta nibhānā chāhtā hai