tumhāre ishq pe dil ko jo maan thā na rahā
sitāra ek sar-e-āsmān thā na rahā
vo aur the ki jo nā-ḳhush the do jahāñ le kar
hamāre paas to bas ik jahān thā na rahā
tū apnī fat.h kā ailān kar maiñ haar ga.ī
vo hausla ki mujhe jis pe maan thā na rahā
vahī kahānī hai kirdār bhī vahī haiñ magar
jo ek naam sar-e-dāstān thā na rahā
sadā.eñ doge palaT kar kabhī to dekhoge
hamāre dil meñ ye mub.ham gumān thā na rahā