azm-e-buland jo dil-e-bebāk meñ rahā
aks-e-jalīl us kā mirī ḳhaak meñ rahā
mere laboñ pe DhūñDte guzrī tumhārī umr
iz.hār-e-ġham to dīda-e-namnāk meñ rahā
chhoTā sā ek zarra hī vaj.h-e-hayāt hai
zauq-e-numū kahāñ ḳhas-o-ḳhāshāk meñ rahā
phāḌā hai us ke ġham ne garebāñ ko is tarah
bas ek taar dāman-e-sad-chāk meñ rahā
'āzar' hai ik tasalsul-e-inkār-o-āgahī
roz-e-azal se jo mire idrāk meñ rahā