bastiyāñ ho ga.iiñ benām-o-nishāñ rātoñ-rāt
aise tūfān bhī aa.e haiñ yahāñ rātoñ-rāt
jī meñ aatā hai ki ta.abīr tujhī se pūchheñ
ho gayā ḳhvāb tirā jism-e-javāñ rātoñ-rāt
shaam hañgāma thā ḳhushiyāñ thiiñ hasīñ chehre the
kho ga.ī mahfil-e-ahbāb kahāñ rātoñ-rāt
husn jaltā rahā sham.oñ kī tapāñ ḳhalvat meñ
ho ga.ī mash.al-e-mahtāb dhuāñ rātoñ-rāt
ik jahāñgīr ḳhamoshī kī rajaz-ḳhvānī hai
ho gayā kyā ye mire ghar kā samāñ rātoñ-rāt
kaun in kaliyoñ kī qismat pe na ro.e 'ḳhātir'
jin ko kar detī hai taqdīr javāñ rātoñ-rāt