vahshatoñ kā kabhī shaidā.ī nahīñ thā itnā
jaise ab huuñ tirā saudā.ī nahīñ thā itnā
bār-hā dil ne tirā qurb bhī chāhā thā magar
aaj kī tarah tamannā.ī nahīñ thā itnā
is se pahle bhī ka.ī baar mile the lekin
shauq dildāda-e-rusvā.ī nahīñ thā itnā
paas rah kar mujhe yuuñ qurb kā ehsās na thā
duur rah kar ġham-e-tanhā.ī nahīñ thā itnā
apne hī sāyoñ meñ kyuuñ kho ga.iiñ nazreñ 'ḳhātir'
tū kabhī apnā tamāshā.ī nahīñ thā itnā