jafā.eñ baḳhsh ke mujh ko mirī vafā māñgeñ
vo mere qatl kā mujh hī se ḳhūñ-bahā māñgeñ
ye dil hamāre liye jis ne ratjage kaaTe
ab is se baḌh ke koī dost tujh se kyā māñgeñ
vahī bujhāte haiñ phū.koñ se chāñd tāroñ ko
ki jin kī shab ke ujāloñ kī ham duā māñgeñ
fazā.eñ chup haiñ kuchh aisī ki dard boltā hai
badan ke shor meñ kis ko pukāreñ kyā māñgeñ
qanā.ateñ hameñ le aa.iiñ aisī manzil par
ki ab sile kī tamannā na ham jazā māñgeñ