tujh se mil kar is qadar apnoñ se begāne hue
ab to pahchāne nahīñ jaate haiñ pahchāne hue
but jinheñ ham ne tarāshā aur ḳhudā.ī sauñp dī
aa ga.e haiñ sāmne patthar vahī taane hue
ḳhalq kī tohmat se chhūTe sañg-e-tiflāñ se bache
ḳhuub the vo log jo ḳhud apne dīvāne hue
is ko kyā kahiye ki ham har haal meñ jalte rahe
dūriyoñ meñ chāñd the qurbat meñ parvāne hue
apnī sūrat meñ bhī 'ḳhātir' ek guuna sehr thā
ā.ina-ḳhānoñ meñ farzāne bhī dīvāne hue