jo rañj navishte meñ hai kyūñkar na milegā
likhvā.eñge naama to kabūtar na milegā
jis raat naqāb us mah-e-kāmil ne ulaT dī
tāroñ ko nishān-e-mah-e-anvar na milegā
abr-e-shab-e-furqat hai bañdhe āñsuoñ kā taar
is tarah kā vaqt ai mizha-e-tar na milegā
kāhīdgī-e-jism agar yuuñ hī rahegī
ham ko bhī hamārā tan-e-lāġhar na milegā
insāf ko samjho ḳhizar-e-rāh-e-hidāyat
ai 'rashk' ab aisā koī rahbar na milegā